காதலெனும் கடல்............
இரைகின்ற பெருந்நாகமோ இல்லை பின்னலெனும் வெறுங்கூந்தலோ? சீறிவரும் கூருகிரோ இல்லை சீராரும் கயல்விழியோ?
=========================================
=========================================
அவனுக்கோ...
===========
சேர்த்துக் கட்டி வரிந்தாலும்,
பார்த்தால் உளம்கொய்திட,
ஆர்ப்ப ரித்தே இரையுமொரு,
பெருந்நாகம் என்றானால்:
அவளுக்கோ...
===========
நீள்விரலால் வாகொதுக்கத்
தோள்சரிந்தே காதோரங்
காற்றலைவிற் கதைபேசும்,
பின்னலெனும் வெறுங்கூந்தல்...
அவனுக்கோ...
===========
உளங்கிழிக்கச் சட்டென்றே,
மின்னலதன் வடிவதுவாய்,
உயிர்குடிக்கச் சீறிவருங்
கூருகிர்கள் என்றானால்;
அவளுக்கோ...
===========
அவனெழிலை அமிழ்தெனவே
அன்பதனால் அன்றாடம்
தான்குடிக்க ஏங்குகின்ற,
சீராருங் கயல்விழியோ?
====================
இராச. தியாகராசன்
பிகு:
கூருகிர் = கூரிய நகம்
கருத்துகள் இல்லை:
கருத்துரையிடுக