தாய்மை.......

தாயவளின் நெஞ்சுக்கும் உண்டோ நிகர்.....
=========================================

=========================================
அன்பிற்கும் உண்டோ அணை?
(நேரிசை வெண்பாக்கள்)

===============================

உயிரதனைச் சேர்த்தே உதிரப்பா லூட்டி, 

துயிலதுவுந் தான்மறந்து துன்பம் – நயத்தன்பால் 

தன்மக்கள் மேன்மைத் தவமியற்றுந் தாயவளின் 

அன்பிற்கு முண்டோ அணை?

நன்னெறியை நாடுவைநீ! நானிலத்தில் என்னுயிரே 

புன்னெறியைச் சாடுவைநீ பூமலரே – இன்னுலகில் 

அஞ்சுதலை முற்றும் அறுத்திடுவாய் என்னுந்தாய் 

நெஞ்சுக்கு முண்டோ நிகர்?

எதிர்கொள்ளும் பேராசை, ஏக்கழுத்தம் மாய்ந்தே, 

சதிவலை வீசுவோருஞ் சாய - மதியால் 

முனைந்துநாம் சீர்த்தியுற முன்னுழைக்குந் தாயின் 

கனவுக்கு முண்டோ கரை?

 

வீரத்தைப் பாடலாய் வண்டமிழர்ப் பாவியமாய், 

ஆர்க்கின்ற தாலாட்டாய், அன்புமனச் – சீர்மையெனச் 

சேய்தன் இதயத்தில் சேர்க்கின்ற தாய்மையின் 

தூய்மைக்கோர் ஈடேது சொல்!

================================

இராச. தியாகராசன்

பிகு:

நயத்தன்பால் - மேவிட அன்பால், ஏக்கழுத்தம் = இறுமாப்பு/ ஈகோ, 

சீர்த்தி = கீர்த்தி/ பெருமை/புகழ்,  பாவியம் = காவியம்.