கல்வியோ கல்வி.....

(நிலைமண்டில அகற்பா)
==============================================

==============================================

கல்வியோ கல்வி....

==================

பெண்ணின் பெருமை போற்றலொரு கல்வி;

தண்மை யுடனே காத்தலொரு கல்வி;

மண்ணின் மேன்மை மனிதமொரு கல்வி;

வெண்மை யென்னும் மெய்ம்மையொரு கல்வி

தடுக்க வியலாத் திரையுமொரு கல்வி;

நடுங்க வைக்கும் நோயுமொரு கல்வி;

நடக்க வைக்கும் கொழுப்புமொரு கல்வி;

அடக்க வியலா அரசுமொரு கல்வி;

பொங்கிடும் நந்தமிழ் நூலுமொரு கல்வி;

மங்கா தொளிதேடும் விட்டிலொரு கல்வி;

செங்கதிர் தீட்டும் செம்மையொரு கல்வி;

கங்கிருட் காட்டின் கருமையொரு கல்வி;

  

நடுக்கிய குளிரில் உறைதலொரு கல்வி;

அடுக்கிய சொல்லின் அசையுமொரு கல்வி;

சொடுக்கிய விரலின் விசையுமொரு கல்வி;

முடுக்கிய வாழ்வின் முனைவுமொரு கல்வி;

கவர்ந்தே இழுக்கும் கனவுமொரு கல்வி;

சிவந்து சிரிக்கும் வானமொரு கல்வி;

பவள மல்லி மலருமொரு கல்வி;

திவலை தெறிக்கும் திரையுமொரு கல்வி;

  

கவர்ந்தே இழுக்கும் கன்னியொரு கல்வி;

பவள மல்லியாம் யிதழுமொரு கல்வி;

குவளை நிகர்த்த விழியுமொரு கல்வி;

அவளின் சிரிப்பில் விழுதலொரு கல்வி;

மின்னித் தோன்றும் வில்லுமொரு கல்வி;

பின்னி யெடுக்கும் மழையுமொரு கல்வி;

சன்னல் ஊடாய் வெளிச்சமொரு கல்வி;

என்னை மறந்த எண்ணமொரு கல்வி;

 

கன்னற் சுவையாம் இனிப்புமொரு கல்வி;

புன்னை வனத்துப் பூக்களொரு கல்வி;

தென்னை வனத்துத் தென்றலொரு கல்வி;

என்னில் முகிழும் கவிதையொரு கல்வி!

====================================

இராச. தியாகராசன்.